Paghambuok sin Ummat Islam:

Muna-muna wiyajib sin sara’ tartantu duon ha nakura’ sin hula’ Islam a muna in subay maon in silaturarahim, tabang-manabang, paghambuok, kasimangasi iban buddi mamuddi. Tumagna’ daing ha pihak sin sila kanakuraan papagkahi nila nakura’. Saplag pa katan ra’yat majmuma’ bilang “Ummatan wahidan”. In lawan niya, bang in kaawnan sin kanakuraan napupulakkanat na’ tartantu tuod in kaawnan sin ra’yat labi in kapulakkanat. Daing hasabab yadtu magmanja’ na in pamarinta jahil. Tumimbul na in pagdaruhaka’ sin ra’yat pa nakura’ iban pamissuko’ sin nakura’ pa ra’yat.Akhir niya humugut na in binglod sin kadina kajuljanaan ha liog sin majmuma’. Iban bukon na mustahil dumatung in la’nat sin maha adil Allah pa manga sila amoin masub magpulakkanat.Daing ah sabab ini subay tuod magmuhot-muhot in kanakuraan maghambuok. Biya sin paghambuok sin Muhajirin iban Ansar. Adapun in paghambuok ini tumagna’ ha niyat iban kakahinang.

Mamalihara’ ha agama:

In sumuno’ tanggung jawab sin nakura’ bilang hamba sin ra’yat amuna in mag-ammal, magpasambu iban magpasampay sin agama Islam. Ha sabab karma; tupot duon da ha agama sin maha sutsi Allah lumantup in kasabunnalan, mahambuok in manusia, madauhat in kasajahitraan, dumagbus in kama’muran hikapamarinta in ka-adilan. Barma’ na malu’mus na in ra’yat iban sin nakura’ nila bang in kawnan nila timaikud ha sara’ sin al-Quran iban sin Sunnah sin Rasul saw. Amuna in maparuli sara’ biyaktul sin pagkahi manusia iban luhaya na kapagmanjaan sin satru’ nila. Na kabinsanan na in dumatung kanila muna-muna pa nakura’ na sabbut. Iban tartantu tuod hika binsana na ha nakura’ yan in manga pangalta’ niya mabut na pakawasa piyangandul kaniya.Sahinnga hikapasusun niya ra daing ha dunya mabut pa adlau gana-gana.Nauju billah min zalik! Sabunnal-bunnal tuod sung da pissukuon sin bangsa Yahudi iban Nashrani in Ummat Islam daing ah sabab sin pagpahil-pahil sin nakura’ naraak iban simapa magtao-maas ha ra’yat.

In pag palihala ha agama bilang taggung jawab sin nakura’ hula’ agad na duon kaniya in jumaga siya daing ha panglaraki iban panglungkupi sin satru' ha agama niya. Pikil mu kiyalunkupan nabaha’ in agama ta? Sumuno’, in kaawnan sin nakura’ subai siya maglugt’ mang-unahi magpagal sin kamaruan sin agama niya. Magmasakit ha waktu tasakun na sin satru’ in mag-aagama. Iban labi apdal bang in kaawnan sin nakura’ adil yan kasaksiaan mattan haunahan siya sin sapan mamaugbug ha agama Islam biya’ an sin pag-ammal ibadah. Nakura’ suntuan ha agama.

Magjaga kasalamatan iban sin kasajahitraan atawakan ka-amanan sin hula’:

In kasalamatan iban kasajahitraan sin hula’ tanggung jawab dakula’ pahambuok hamba sin ra’yat. Sabunnal-bunnal tuod bang in nakura’ nagsi-sipat gaga (daing ah isog iban kapandayan) magpahijjatul sin kahanungan sin hula’ iban ka salamatan sin ra’yat, ampa ma-ammal niya in toriqah sin rasul saw bilang panduga niya na’ mapaaun niya in kama’muran daing ha kawman pa kawman. Sumugawa’ bang in kaawnan sin nakura’ yan pahil-pahil in pagmabuga pa Allah na’ di kumakkal in duon ha lima niya in pagkawasa niya sabab karna’ di’ ma-aon in kakkal sin pagtaat sin ra’yat niya. Tupot kabuga’ ra pa Allah in hika taalluk sin mahadjana pa hambuok nakura’ insaAllah. Na’ ha karna’ sin pagmabuga’ niya pa Allah magkukusog in bulansang sin kasundaluhan niya, magtaayun in sagannap mahadjana’ tumuko kaniya, tumabang pa in hula’ pangdaig niya iban dahitun na satru’ niya. Iban ha sabab sin taat niya pa Allah pagtaatan siya sin ra’yat niya bilang tungbas sin Allah, daing hasabab ini magmumpaat na in pamarinta niya. Ukab na in kasambuhan sin hula’ insaAllah. Sahinnga masalamat na sila daing ha pamarinta jahilliya. Na’ maginut-inut na mapapas in pagmuparik sin pa kaniya-pakaniya tumpukan, bukon na magbuno’ magkahi sumugawa’ maaon na in pagsulut-siyuluti bilang magtaymanghud ha agama Islam. Way na pagnakura buat malaing kan pagnakura’ hambuok ha babaan sin panji Islam. Ha hal ini, subay in kaawnan sin pamarinta habaan sin nakura’ sajahitra’ magtagama sila kusog hiatubang nila ha satru’ sin Allah, ha biya’ na sin pamandu’ sin al-Quran ha surah al-Anfal ayat hika 60.

Mafhum niya;

“Pagsaddiya kamu hauno-uno na kusog hi atubang niyo ha satu"

In nakura’ makapasajahitra’ sin kawman niya bnag in kaawnan sin atay sin hambuok nakura’ yan sajahitra’, saddiya mamalihara sin kasalamatan daing ah pam\nindas sin manghihilu-hala’ iban lilla’ tangsuan siay kawasa ha waktu bukon na sajahitra’ in kaawnan niya.

Magpaun Program ha Ra’yat:

Piyalingkud pa kawasa sin ra’yat sin nakura’ kasupaya makapag tabarrru’ pa agama, hula’ iban ra’yat. Adapun in ra’yat magkalagihan isab program ha kisa sannang sin kabuhinan nila. Bihadtu ra siab in kaawnan sin nakura’ naglalag dan hika paon program ha hika sambu sin mahadjana’. Bukon maon duon kaniya in napsu kabasi’ iban napsu ha hika larak sin tao habaan niya. Ha di’ magpikil sin tupot hadja hika dauhat paruntungan sin ahli kaluarga niya atawkan sin sila magsila hadja pihak hakataasan.

Bang in kaawnan sin program ini tartantu pa ra’yat daing ah sabab yadtu subay lumabay daing ha pikilan sin ra’yat. Sabab karna’ labi makahati in ra’yat sin uno in kulangkabus kanila. Barma’ na tanggung jawab sin nakura maon niya in paghiyati-hatihi iban sin ra’yat niya.

Ha program ini lumanyut na in pamarinta sin hambuok nakura’, kiyatunay niya na lungbus in hak sin ra’yat bilang tanggung jawab niya. Sibu’-sibu’ na sila way nagking-king nag bakul numanam sin ni’mat sin pamarinta. Dumagbus na in parjajiaan sin nakura’ iban ra’yat bilang Ummatan wahida. Mahambuok na in ra’yat, maparihala’ na in

kahanungan sin hula iban maparihala’ na in pangatayan sin nakura’ daing ha mag-niyat pakajahilan.Mahuli di’ na dulan sin Allah in kalaungan.

In kami ini ulangig hadja sin ra’yat, in tanngung jawab yan da ha atay sin kamu kanakuraan namu’. Tanggung jawab isab sin kami manghimati kaniyo. NAPIKIL MU SAYAN WAHAY KAU NAKURA’ NAMO KALASAHAN, NA’ PARABBUSA NA!

Biyaktul hi: Nur Danial